-->

Двете екипи, Металург и Целје се надеваат дека ќе ја прекинат едномесечната пауза без триумф во СЕХА Газпром лигата. Нивниот дуел во Скопје, во четврток во 17,45 часот ќе биде прва меѓусебна средба во регионалното натпреварување.

 

Металург последен пат се радуваше на триумф во СЕХА Газпром лигата пред домашна публика против Татран, на 18 септември, по што следуваа три натпревари во кои двапати е поразен на гостински терен, и еднаш играше нерешено. Во ЕХФ лигата на шампионите во групата Ц имаше триумф пред десет дена против Ла Риоха, а потоа следуваше серија од два меча со порази.

 

Целје имаше три тешки натпревари во СЕХА лигата, против Вардар, Веспрем и Мешков, и сите ги загуби. Лоша серија има и во ЕХФ лигата на шампионите каде освен победата во првото коло, ана следните три загуби, а во последното коло во Шведска извлече реми во последните секунди. Доколку сака да остане во игра за место што води на Ф4 турнирот, словенечкиот тим мора да ги освои бодовите во Скопје, бидејќи сега заостанува четири бода

 

Металург има проблеми со повредите кај интернационалците. Немања Младеновиќ ќе мора на операција, Немања Обрадовиќ се уште се опоравува, а на повреда се жалеше и Милош Драгаш. Претходно поради повреда сезоната заврши и за Мартин Марчец.

 

 

Лино Червар, тренер на Металург:

Целје е незгодна екипа која што игра брзо и модерно. Транзицијата на Словенците е одлична. Многу патувавме во последно време, но мислам дека и покрај силното темпо кое што ни се наметнува сепак ќе успееме да се консолидираме за овој натпревар. Мислам дека ова е еден од начините да се изгради силна екипа, да се произведат добри ракометари. Сите интернационалци ни се повредени, остануваме практично со македонските ракометари. Младеновиќ најверојатно ќе оди на операција, а Обрадовиќ се уште не е потполно фит.

 

Марко Нелоски, играч на Металург:

Целјс ни е непознат противник. До сега не сме играле против оваа словенечка екипа, која што е микс на млади, и не толку искусни ракометари, и повозрасни ракометари со многу искуство. Негуваат многу брза игра, полуконтра и брз центар, и многу се технички потковани. Не смееме да влеземе во нивната шема, ако успееме да се справиме со овој сегмент од нивната игра и ако одиграме како во првото полувреме од мечот со Монпеље во ЛШ, мислам дека ќе успееме да извлечеме позитивен резултат.

 

 

Бранко Тамше, тренер на Целје:

Металург има млад и хомоген тим. На домашен терен секогаш играат со дополнителен мотив, што им носи проблеми на поголемиот број тимови со кои играат. Јасно е дека го имаат направено тимот со чиста визија и играчите се ордени 1994 и помлади. Тоа значи дека овој тим секогаш е гладен за успех и тоа с егледа во нивните резултати. Нивните резултати некогаш имаат падови и искачувања, и се млад тим кој во последно време има проблеми со повреди. Затоа некои од резултатите не ја покажуваат вистинската слика за тимот. Свесни сме дека ќе направат се што можат да го победат Целје, но се разбира ние патуваме со некоја цел, да победиме во Скопје. Знаеме дека тоа нема да биде лесна задача, мора да сме добро подготвени за натпреварот за да можеме да победиме, и патуваме по освојување на трите бода.

 

Лука Жвижеј, играч на Целје:

На овој натпревар единствена предност на Металург е домашниот терен, каде навистина играат добро, и се навистина опасни за сите ривали што го покажуваат и резултатите. Една од нашите предности е што патуваме без каков било притисок и имавме време за подготовка за натпреварот. Сакаме да победиме во Скопје, но свесни сме дека тоа ќе биде навистина тешка работа.