Вардар за два дена ќе одигра два натпревари во СЕХА ГСС лигата, и тоа пред домашна публика. Утре (среда, 22.10.) во Скопје гостува тимот на Раднички Крагуевац, а потоа во петок (25.10.) на мегдан доаѓа Татран Прешов.
По напорниот месец во ЕХФ Лигата на шампионите и четирите натпревари без пораз, на кои се надополнуваат и две победи во СЕХА ГСС лигата, сега Вардар има цел да го заврши месецот со серија од пет натпревари без пораз и четири победи. Македонскиот вице-првак влегува во натпреварот како апсолутен фаворит. Раднички после несреќниот пораз во Бања Лука се надева дека ќе успее да даде доволно силен отпор за актуелниот првак во СЕХА ГСС лигата.

Вардар најави само една измена во тимот, и тоа на местото на Алекс Душебев кој заработи лесна повреда на дуелот во Монпелје. Неговото место ќе го заземе Стефан Терзиќ кој вообичаено нема голема минутажа. Но, тренерот на Вардар, верува дека токму играчите кои имаат помала минутажа ќе имаа поголема мотивација да докажат дека поседуваат висок квалитет.

Гостите од Крагуевац најавија дека ќе бидат со најсилниот состав. Раднички по вторпат доаѓа во Скопје сезонава, а на првото гостување загуби од Металург, 22-35. Раднички досега има една победа (Борац), едно реми (Војводина) и четири порази и со четири бода се наоѓа на седмото место, веднаш зад Металург. Вардар го очекува мечов од втората позиција, со 15 бода, три помалку од Веспрем

Раул Гонзалез - тренер на Вардар

"Ќе треба да ја прилагодиме екипата од натпревар во ЕХФ лигата на шампионите, на меч од СЕХА ГСС лигата. По ремито што го постигнавме во Франција ни претстои меч против многу поинаков ривал. Раднички игра одбрана во формација 3-3, и ќе мора да бидеме подготвени за тоа. Можеби нашите играчи се малку уморни, но наша цел е да го продолжиме победничкиот од. Изгледа дека ќе биде лесно бидејќи играме дома, но мораме да одиграме добро, особено во нападот. Можеби имаме некои уморни играчи, но имаме и играчи кои се желни да го покажат нивниот талент, како што е Стефан Терзиќ"

Стефан Терзиќ - играч на Вардар

"Се согласувам со мојот тренер, Раднички е тим кој често ја менува одбраната за време на натпревар. Играат и добар ракомет, типично балкански. Тоа значи дека ќе се борат до последна минута, но и дека се тим што има квалитет, иако загубија неколку натпревари со тесен резултат, со еден или два гола разлика. Но, нашиот план е да победиме"

Недељко Вучковиќ - тренер на Раднички

"Мислам дека мојата екипа ќе се опорави пред се психолошки од натпреварот во Бања Лука, и дека повторно ќе одиграме добар натпревар против една од најдобрите екипи во Европа. Овој натпревар доаѓа три дена после оној со Борац каде одигравме извонредни 50 минути, по што следеше пад во играта поради што и бевме поразени. За квалитетот на Вардар не треба да се трошат многу зборови. Резултатите што ги постигнуваат не се случајни, и според мене тие играат најубав ракомет во Европа. Се надевам дека екипата ќе биде на ниво како во првите 50 минути од мечот во Бања Лука и ќе можеме да дадеме отпор."

Александар Гуглета - играч на Раднички

"Екипа која е составена од репрезентативци како Штербик, Дибиров, Марковиќ, Абутовиќ, Стоилов, сама по себе е голем мотив за моите соиграчи и за мене, да одиграме над своите можности, и да дадеме достоен отпор против фаворитот. Ова е натпревар за кој не треба посебна подготовка, и сакаме да го искористиме нивниот евентуален умор после натпреварите во Лигата на шампионите во Франција. Ако ја повториме играта од Бања Лука, до 50 минута се надевам дека може да дадеме достоен отпор."