Иако се работи за меч на фаворит и аутсајдер, двете екипи, и Металург и Борац, на средбата што треба да се игра во Скопје (сабота, 20,15 часот) ќе им дадат шанса на помладите ракометари. Ваква праксата често користи Металург сезонава, да игра со комбиниран тим, составен од помлади играчи кои често немаат друга шанса за повеќе време на терен.

Гостите од Бања лука пред една седмица првпат се израдуваа на победа во СЕХА ГСС лигата, на дуелот со Раднички. Металург има три победи и два порази, и се наоѓа на 6 место на табелата.

Металург сигурно ќе игра со комбиниран тим, слично како и во Нови Сад. На болки се жали Павел Атман, поради проблеми не тренирале ниту Кукоски и Јоноски, а Манасков добил удар во коленото, п аи неговиот настап е неизвесен. Тимот од Бања Лука ќе биде не Микиќ, Обрадовиќ и Ѓукиќ.

Лино Червар - тренер на Металург

СЕХА лигата ќе биде како и секој друг натпревар во ЛШ, секако дека целта секогаш ќе биде победа, но работиме на нов проект, кој е долгогодишен и бара трпение. Правиме добра работа за ракометот во Македонија.

На истиот начин ќе размислуваме и со Борац, повторно ќе им дадеме шанса на помладите. Борац е еден противник кој пред сезоната имаше проблеми, но во текот на првенството се средија, уште ги има тие искусни играчи како Тривунџа, Обрадовиќ и тие се спој на искуство и младост. Натпреварот ќе ни дојде добро, иако немавме многу време за подготовки.

Филип Талески

Борац е сериозен противник, кој има доста искусни играчи во екипата. Ние ќе бидеме со комбиниран состав и мислам дека треба да влеземе мотивирано и со самодоверба за да ја оправдаме фаворитската улога на домашен терен. Ја повикувам публиката да дојде во што поголем број и за да не бодрат и затоа што натпреварот ќе има хуманитарен карактер

Игор Раѓеновиќ - тренер на Борац

Се надеваме дека Металург ќе игра со играчи од вториот тим кој настапи и против Војводина. Тоа би била добра прилика и ние д аги испробаме нашите млади ракометари. Ние реално немаме резултатски императив во Скопје. Ќе бидеме ослабени со неиграњето на Микиќ, Обрадовиќ и Ѓукиќ. Ќе им дадеме шанса на младите играчи кои се надевам ќе дадат се од себе да покажат добра партија.

Ѓорѓе Челиќ - играч на Борац

Пред нас е тежок натпревар. Металург е одлична екипа. Се подготвувавме во текот на минатата седмица за овој натпревар. Одиме на дуел со цел да одиграме најдобро, немаме посебен притисок. Заминуваме без некои играчи, па ќе ни биде тешко, но одиме да одиграме најдобро што можеме и се надеваме на добар резултат.